हुने नहुने

हुने नहुने सबै सबै काम गरेको छु

यो प्यार जोगाउन खुब इन्तजाम गरेको छु

कस्सम आफैंलाई कहिल्यै ढाँटेको छैन

दुनियाँसंग जरुर थोरै छलछाम गरेको छु

कोहि हिँडेको थियो यो बाटोमा कुनै दिन

उसका पद चाप खोजी खोजी सलाम गरेको छु

बाँच्नु भन्नु भित्र भित्रै मर्नु हो रहेछ

पटक पटक यो मनको कत्लेआम गरेको छु

मैले कोरेका यी घेराहरु

मैले कोरेका यी घेराहरुको के होला ?

मलाई प्रिय चेहराहरुको के होला ?

मेरा सुस्केराहरु रहलान् नरहलान् ?
म नाचेका यी पखेराहरुको के होला ?

जब सधैंका लागि उडेर जानेछिन् आमा

गुँडमा पर्खिने बचेराहरुको के होला ?

यो यात्रापछिको यात्रा कता जाने हो ?

यहाँ सँगालेका फेराहरुको के होला ?

जब एक्लै एक्लै जानुछ, रित्तै जानुछ

हाम्रा यी ‘तेरा र मेरा’हरुको के होला ?

(फाल्गुन १५, २०७५, पोखरा)